Ukpipa Pu Hau Cin Khup
Sukte Pu Kam Hau tu, Pu Hau Pum leh Pi Tel Ciin te tapasal upapen hi a, 1872 kumin Tedim khua ah suak hi.Mikang kumpi hong khantoh laitakin Tedim gamah a galhang pen, a vaihawm siam pen ahih manin May 7, 1894 ni-in ukpiza kipia hi. A kum 22 pha pan hi.Ama hun sungin Tedim-Tonzang gamah khua tampi sat sakin, khua lian teng ah Mangbuk (zintun inn) lam kawikawi hi. Khua khat leh khua khat kikawm nadingin lampi ziikin kikawmna nuam sak mahmah hi.
Ama khan ma-in sial zawi bangbek tawh khua khat leh khua khat kikawmna bek om in, tu aa ih lampite ama khansung kizik lampite ahi hi.A pil a ciim, mi kizen, gam uk siam, Zo ngeina kiplet, thukhual mahmah ahi hi. Tua banah zing sangin lol mahmah se in, lungduai leh mi hehpih siam mahmah ahih manin aukna gam, khua mite in it mahmah hi. Mi minthang mahmah ahi hi. Midang tawh kibang loin, ha tung ha nuai 36 nei se-in mituam pian khat zong ahi hi.
Mangkang kumpi te tungah thuman ahih manin, min phatna lai tampi tak mah tawh pahtawi na angah hi. Tua te in (Certificate of Good Service), Volunteer Decoration Medal Ngun nam (Silver Mounted Sword), kham khi guipi (Kyet thaye sang Shwe Salwe yah Min), King Service Medal (KSM), Saithau lawng khat, Pistol khat ngah hi. Galpi masa huh nadingin Rs.1150 kumpi te tung pia hi.
Pasal hat leh a picing ahih zah khatin, pute pate kidemna samat galmat kidem lai ahih zah khatin, Pu Hau Cin Khup a khan sungin, Sai hapak 6, Saipi 2, Zangsial 8, Humpi 2, Kamkei 2 leh sa nautang 200 val man hi.A cidam phat nawnloh ciangin Ukpipa in a tapa Pu Pum Za Mang tungah Ukpiza November 30, 1924 ni-in aap hi. A tapa Pu Pum Za Mang Ukpiza a aap khit teh dam lo suak ahih manin kum 10 kiim a sawt dektak September 10, 1934 zingsang nai 7 hunin Ukpi khuapi a maanna khua Tonzang ah hong sihsan hi.
A tapa a za luah Ukpi Pu Pum Za Mang in, 1935 kumin Sial 74, Lawi 18, Bawng 11, Sakol 2 han ken sak hi. Zo ngeina cingtakin Pu Pum Za Mang in apa vui a, Mualsuang ukpi te han gei-ah om lai hi. A zi masa Pi Ciin Za Niang tawh tapa Pum Za Mang leh tanu Lian Za Cing nei hi. A suan a khak Pu Sian Lian Pau te leh Pi cingpi ta Major Khup Cin Pau te innkuan ahi hi. A zi kik Pi Vung Khaw Man tawh tanu Ciin Khaw Lun tapa Hau Cin Pau, Kam Cin Thang leh Lian Cin Thang te ahi hi.Pu Hau Cin Khup laphuah khat:a) Sim sal in va pai ing e, zanggam lei ah kua tawi na hiam na phung min sial aw ci e, b) Tu tawm hile’ng ka phung minsial ve ninge, kapianna nibang lun e, sial ngam lang e.
