Dr. Thang Pian Thawn
Tedim ah 1988 in a suak Tg Thawng pu pen Ayeyarwady Bank ah Assistant Vice President dinmun hong ngah hi. 2015 in American Embassy ah nasem in Financial Specialist dinmun tawh Peace Corps Agency thak hong bulpatkhiat pih in Kawlgam Peace Corps founding members khat ahi hi.
Apiancil lam:Tg. Thang Pian Thawn @ Thawnpu pen ni 10 April kha 1988 in Tedim khuapi, Chin State ah na piangkhia hi. Anu Dim Ngaih Lian Cing pen Anlangh khua ah suakin, a pasal neih khit nungsiah Tedim ah teengin Sakollam veng ah Zatui sai zuak leh inn nasep sem hi. Thawnpu ii Pa Nang Suan Gin ahih leh Anlangh khua tualsuak hi a, Tan li a sim zawh khit ciangin Tedim khuapi pai in Sakollam Sangpi ah pilna nasin beh hi. Sum bawl sum zuak nasep siam khat hia a, innkuan, Pawlpi, khua leh tui phattuam nadingin Sangsia, Upa, Hausa dinmun ah panla in Pa hoih khat na hi hi.
Aneutung a kipanin Thawnpu in anu leh pa ukna nuai ah na khangkhia hi. Thu-ummi innkuan sung panin khangkhia khat ahih mah bangin Biakna saanginn te ah kah in pilsinna na kipankhia hi. Sakollam Adventist Seminary pan in tan li a zawh ciangin a inn pan un tai 3 bang kigamlatna sangah khe tawh lamsiau in pilna na zong hi. Tan sawm asin kum 2005 in Anderson Adventist Seminary (AAS) sangpi panin “Model of the year” cih Pil tungtuang leh Makaihsiam pahtawina kipia hi.
Tua kumin tan sawm hong bek thamloh in tua sang kum Kawlgambup tan sawm laivuanna ah Distinction (All-D) angah mi 17 lakah khat in hong kihel zo hi. Upper Myanmar sangnaupang te lak panin Distinction tawh azo amah bek om ahih manin AAS sangpi in zong minphatna ngah in angtang mahmah uh hi.College kah dingin kawlgam khanglam hongzin suk a, 2009 kumin Myaungmya a om Myanmar Union Adventist Seminary panin Bachelor in Business Administration lukhu neelkai hong ngah hi. A sanggamte panpihna tawh Gamdang sangkah dingin hong kithawi khia a, 2012 kumin Adventist University of the Philippines sangpi panin Master in Business Administration (MBA) hong ngahkhia hi. Lai-uk leh laisiam mi khat ahih na tawh kizui in mat hoih ngahin Academic of Excellence cih pahtawina zong College of Business panin kipia hi. Ih biak Topa, pianna Nu leh Pa leh a sanggamte deihsak panpihna tawh University ofSanto Tomas Graduate School ah Ph.D in Commerce hong zom to suak a, 2015 June kha in mazang tak leh mazo takin sanglai te zo-in pianna Zogam, kawlgam ah nasem dingin innlam hong zuankik hi.
Nasepna: BBA buaih angah zawh phetin apianna Tedim khuapi Zogam ah hong ciahto pah a, 2009 kum April kha in Supervisor panmun tawh World Vision ah anasep masapen hong kipan khia hi. Philippines gamah sangkah in aom sungin Financial Analyst, consultant leh Statistician semin kum 5 sung bang Company tuamtuam, Client tuamtuam leh UST sangpi ah nasem in om hi.
Nasep siam leh makai hoih khat ahihna tawh kizui in siamsin na Philippines gam pan Kawlgam hong ciah zawh phetin nasep ngah pah a, August kha 2015 kumin United States Embassy, Yangon zumpi ah nasep hong kipan hi. Financial Specialist dinmun tawh Peace Corps Agency ah nasem a, nasep siam ahih manin a lawm agual te leh a Director te mahmah ii pahtakna maipha ngah mahmah hi. A nasep zawh asawtlo kha 2 khit ciangin American khuapi Washington D.C. ah na sepzia sinbeh ding leh American Kumpi thukhun leh sepdan te sin dingin sawlna hong ngah hi.
2015 kum November kha in United States of America Kumpi ii Contracting Officer Warrant hong ngah khia hi. Sumlepai zuunukna (Financial Management) lam asiam diak ahih na leh sumbawl sum zuakzia a lunglutna lianpi tawh 2016 kum bei ciangin Kawlgam Bank lian khat ahi Ayeyarwady Bank te nasep piak na hong sangin Assistant Vice President dinmun tawh AYA Bank Headquarter, Yangon zumpi ah nasem hi.Nuntakna sungah bang thupi nasa aa, na gualzawhna thusim nong hawm thei dia?Nate hoih muh ding kisam hi.
Nate ih muhdaan in ih ngaihsutzia leh ih gamtatzia hong piankhiatna hi. Leitung nuntak pen Ngimna khat, uuk khat ineih kei leh a cimhuai mahmah khat ahi hi. Na nuntakna sungah khatpeuh nuse ngei kei in, khat peuh masuan in. na thahat nate puah in zuun in, thanem nate hilo. Na deih leh nungdelh inla va la in, ngak ken. Gualzawh matutna na ngah nadingin paibang napom cip ding, nang ong lawpsak ding hong tawsawn ding khat na kisam hi. Bangin hong lawpsak hiam? Email: tpthawn@gmail.com
