Pa Gin Suan Cin (Cinpi)
Tonzang khua Pa Thawng Khan Thang leh Nu Nian Do Cing te sung panin 4.5.1968 kumin ka suak hi. Nu Cing Khan Lun (Nursing) tawh kiteeng in tanu Lia Cing Sian San Lun kanei uh hi. Sanggam numei Ngai Deih Lun leh Makpa Nang Zam Cin leh a tapa Tg Thang Sian Za Khual leh kanau pa Tg Khen Kim Siing tawh ka om uh hi. Ka Pawlpi pen Roman Cathoric (RCM) ahi hi.
Music tawh kisai in 1977 kum tanli kakah lai pek ka-uk ahi hi. A tung lamin nu leh pa ten hong awi khollo hi. A sawt lam ciangin keiuk na ahih manin hong tel siam aa, tha nakpi tak in hong pia hi. Music pen kakhan sungah ka-uk mahmah khat bek ahih banah Pasian in kaki vak nading a hong deihsak leh hong piak Talent hi ding ci-in ka um hi. Ka sia masa te in U Eddie Kyaw leh Salai Za Lyan (The Aces) te ahi hi. Lazy Club Band adin suak theih nading ukna kibang lawm te tawh 1986 kum kapat uh ahi hi.
T.V Programe ahih leh gualnopna dan in ka kipat mawk uh ahi hi. A sawt ciangin mopawi khong, anvak na pawi tuamtuam khong ah tum kawikawi in 1992 kumciang Pu Daly Thein Than ii Series panin music lamah lut in akip suak ka hi hi. Studio pen hunlak mahmah kul aa, Create bawl khit ciang tum theih hunsawt kingah hi. Live Show ahih leh On the Spot ahih manin muhna theihna siamna te kisam mahmah hi. Laa dawng khat pen mipi lunglut nadingin leh lungsim sukkhak nadingin lawptakin tumding ahi hi.
Hih ciang dinmun katun nadingin nisim nai 2 ta bang kasin ahi hi. Lazy Club Band sung panin VCD, leh Tape khui te 200 val ka hawmkhin uh hi. Band khat peuhpeuh ah, kipawl khawmin ih tum ciangin sum leh paai ngah nading bek hilo in, music it pha mahmah a, lungsim pumpi gawmkhawm in sepkhopna in a thu pipen dingin ka um hi. Pawlpi kici peuhmah in tumtheih khempeuh tawh Topa phat aa, ih biak ding adeih ahi hi.
Pasian hong piak letsong ahih manin Pasian deihna mun khempeuh ah kihel ding kaki ap na hi. A gual zo tumging siam khat ih suah nadingin a thupi pen in music pen uk mahmah aa, ih it ngiat ding Topan deih hi. Gamsung gampua ah ka pahtak pen leh ka deih pen in Eric Chapton(Guitor), Nathan East (Bass), leh Pu Za Lyan (Bass) te ahi hi. Hih ciang Topan hong laptoh nading tha hong pia leh phut khak te in 1984 kum tan 10 ka on lai in ka pa leh (pa no Richard Suan pi) in Hallow Guitor khat hong leisak hi.
Ka lawm hoih Ko Maung Maung tung zong ka lungdam hi, tha hongpia hong makaih hong huh tawntung khat hi. Ka inn kuanpih te tungzong ka lungdam hi, hong telsiam in tha hong pia hi. 1992 kum lungdam bawl zan vahna ah zan 6 sung Pasian phatna ah music ka tum manin tua hun pan tuni dong nuntak nading in music a tum ka hi hi. GMI – Magazine 2008 pan kila hi.
