Captain Kam Cin Hang
Pu Do Za Kham (Taithul) leh Pi Niangh Khaw Hau (Sukte) ta upen hi aa, 1.7.1914 in Bumzang khua ah suak hi. 1933 kumin Galkap lut a, 1959 kumin Medical pension tawh tawlnga hi. Zaa khang toto in Zato lakah Captain ngah masa pen kici hi. Galkap sung pan (Bawknih) a ngah khit 11.6.1947) in Tonzang khua a teeng Pu Thang Cin Kham (Sukte), Pi Cing Za Lun (Sukte) te tanu upen Nu Niang Khan Man tawh Rev. Vial Nang in kiten na pia hi.
Tanu nih leh tapa nga nei uh hi. 1949 kum Nyaung Le Bin 2nd Burma Rifles a om sung Kayin gal kipan a, amau Battalion hanciamna tawh Kayin Tapong ten lazo lo hi. 1949 kum One Emergency (4th Chin) Kawlpi ah a phuankhia te lakah makai in kihel hi.
4th Chin Battalion a om sung Pyinmana gam sung a gal kuan na ah gamsai gol mahmah khat man hi. 4th Chin Lt.Col Tun Aung khutnuai a om lai Shwe Bo gamah gal te phualpi luhzo in, kiho theih na set, lai bu bawlna set leh Van manpha tampi laksak zo hi. 1955 kumin Col Dal Za Kam tawh Zangkong Galkap zumpi ah pai-in Zogam pan Galkap thak kaihkhop ding General Ne Win tawh va kikum uh hi. 1958 kum February kha Patheinkyi gal kido na ah a taklam khuk thau tang in kha a hihman in 1959 in pension tawh tawp hi.
Khua leh tui ading hanciamna: (1) 1964-1985 Tedim Myoma veng ah Hausa sem hi.(2) 1970- 1988 Tedim Myoma veng ah Tamah ah Vice Chairman sem. (3) 1964-1985 Tedim No.1 High School, PTA kipawlna ah makai pawl in om hi. (4) 1964 kum Thual Zen gal, 1968 kum Lushei gal, 1977 kum Khaimalin gal te ah kumpite tawh khut kilen in mapang hi. (5) 1968 Lushei galin galten man a, a pistol matsak in amah khah kik hi. (6)1982 Tedim sialtangtui laak na ah, Merlin Shaw leh a tapa Khup Khan Thang tawh kithuah den hi.(7) 1984 Zalui mei Project kipat cil lai in Engineer masa pen tawh sem khawm hi. (8) 1972-73 Tedim gam Khanlawh hun sungin Gup ngah kitel cian na ngah hi. (9) 1974 pan Gupna thu gen khempeuh a ma king tung lo omlo phial ding hi. (10) 1975 EBC Pawlpi hitaleh 1979 AG Pawlpi hitaleh a ma inn nuai Biak piak na in kizang hi. (11) 7.10.1992 in Topa kiang hong ciah san ta hi.
