Col. Dal Za Kam
Ukpi Pu Do Tual leh Pi Pum Kho Man te tapa hi a, April 1,1916 in Saizang khua ah suak hi. A zi Nu Man Kaih Niang tawh tanu 2 leh tapa 2 nei uh hi.
Sangkahna: 1933 in A/V Middle School Tedim ah kahin zo hi. Tan VII a sim kumin Tapidaw suak a tui kiphum pah hi. Nasepna: 1936 kumin galkap tum hi. Galkap course tuamtuamte a kahna ah sang zawh mahmah ahi manin 1939 in Jemadar (Gevernor’s Commission) ngah hi. Kawlgam sung bek hilo, India gam Bangalore ah High Level Education Course leh Deradun ah Motor Transport Officer Training School te ah kah hi. 1941-43 Western Chin Levies ah Adjutant sem hi.
India gam Kitchener College (Officers’Training School) ah kipuak a, 1944 in A.B.R.O Commission, Lt. ngah hi. Captain a ngah zawh ciangin Tedim a kihong thak 2nd Chin Rifles ah sem hi. Tedim hong tun zawh a sawt loin Major in za khang hi. 1947 kumin 2nd Chin Rifles Mingalardon ah 2/IC a sep laitakin Salisbury Wiltshire, U.K ah Senior Officer Training Course kah hi. Hong tun kik ciangin Lt.Col. ngah a 2nd Chin Rifles mah ah C.O.. sem hi. 1948 in Colonel ngah a, No.1 Light Infantry Brigade ah Brigade Commander sem hi. Pegu ah Brigade Commander leh Pegu Commissioner tawh thuah hi. Zomi sung pan Colonel ngah masa pen ahi hi.1951 in galkap sung pan pension la hi. Tua zawh ciangin Bawdwin No.1 Mining Corporation ah Chief-time keeper sem hi. 1975 pan pension la hi.
A siamna leh a kikhaina:Tan VII a sin sungin galkap manglian suah nading mang man khol hi. Pasian gam thu zong mang in man hi. 1952 in “My Conviction” ci-in laibu khat bawl hi. Sukte gam te (Leitawhtan khang siah) galkap a lut theih nadingin Tedim Vuandok zum ah lai-at huh a sep sungin Recruiting Officer tungah gen a galkap lut theih nang ngahsak hi.Galpi Nihna sungin Japante’n a khiantan Zomi buleh nautang 50 bang hon khia hi. Homalin pan Tamu, Tonzang, Tedimah paipih a, gilsan natna leh pulnatna tawh a si ding te nangawn nusia loin tonpihin tunpih hi.
A khan lai-in kanteh kan hat mahmah a, Kawlgam galkap record ah sau veipi, a dem zo om lo hi. Bawlung siamin minthang a kawlgam galkap bawlung team ah kihel hi. India A.B.R.O. Commission a om sungin Japan te in Zogam la a, ciah thei lo ahi manin la phuak hi. (a)Thei bang sen-a zalmang a mat, tu in pai bang pom ing e; (b)Phamsa tuun leh zua cih lai a, zen zen aw, hingkhen ciin leh tuai aw e.
A thubulphuh: “Mi khat leh khat kihehpihna, kikhual-kakna leh kizahtakna, thumanna leh kuhkalna”. A thubulphuh a phuah la,(a)Taang laizom bang namcih kong huai, ka tongdam a kha hiam aw;(b)Phung lian hi’ng ci’n, tang tam gual aw, cik in kong sial ngei hiam aw. 8.9.1977 ni-in No.2 B.M.H. Yangon pan hong nusia ta hi.
