Pu Mang Cin Khup
Lomzang khua (Manlun) beh Pu Tuang Za Go, Pi Man Muang (Taithul beh) te nupa sung pan 1910 kumin, Pu Mang Cin Khup suak in, Suahpih Pu Let Za Hang a neih khit teh a nu si hi. A zi kik Pi Khan Za Cing (Taithul beh) tawh, Nu Don Za Niang, Pa Lian Cin Khup, Nu Dim Za Mang, Pa Kai Cin Thang, Nu Man Khaw Vung leh Pa Thang Khan Zam te a nei hi.
Sangkahna:– SPS Tonzang ah tan IV zo-in Mawlaih khua ah tan V zo hi.
-1933 kumin Paltan (Galkap) tumin, thaukap kidem na-ah 1st price ngah aa, atung siah Bote maipha ngah ahih manin, L/copl kipia hi. 1946 ciang pensen la hi.
-1947 kumin Lomzang khua hausa sem hi.
-1951 kum ciang No.1 Circle Chairman in kiteel ahih manin, Tedim gam Counselor khat in, gam ki-uk na Upa khat ong suak hi. Kawllai theihding akisap lam thei ahih manin, Lomzang khua ah Kawlsia Khin Maung, Khin Taikte cial in lai hilh sak hi.
-1956 kumin MP (Member of Parliament) meekuang lui-in, mipi-in MP dingin teel hi.
-1958-60 (Care Taker Government) sung Zagom vuanzi Pu Ral Hmung in muang ahih manin, Tedim gamsung a vuanzi power bup ap hi.
-1956-60 sungin MP, Zo vuanzi power, Home minister te sem khawm hi. Parliament zumah Vice President tavuan zong kipia hi.
-1960 kumin No.1 SHS Tedim sang innpi Ama’n hong hi.
-1957 leh 1958 kum nih sung Union Day ah Zolaam “Ka khawklai, Saipi khuksu” cih ngeina lam te, Rangoon ah Amah makai in lam valak ngek ngek hi. Kawl ulian te in mu nuam mahmah in lungkim peuh mah ci hi.-
Ama Zo vuanzi power neih sung inter village football tourmament Gamngai khia ah tha pia in Amah mahin en ngetngut hi. Banah Cup (1) zong tua aa ding Ama min tawh pia lai hi. Thu a vaan zo, amu zo mahmah khat ahi hi.
-Tedim gam Senam khua (tu’n Tonzang myone) a kat mang ciangin, Rangoon Parliament zum pi-ah huhna nget sak hi. Antang ip (200) Senam khua ah vanleeng tawh khiasuk hiau hi.
-MP aa kiteel lungdam in, sialtal sangnga nei khat go-aa, khua leh tui khua kim khua pam, amah panpih khut leh khe a a zat a lawm itte tawh pawi bawl zu nungin, zan khat leh sun khat inn sung inn maikim kot in, lamgui kai uh hi.
-1960 Parliament general election ah, MP meekuang lui-in ngah lo hi. Nuntak zonna hangin kumpite kepna thuakkha lai hi.
-1971 kum in Lomzang pan Kalaymyone Kuanglian khua ah lal hi.-Nu Man Niang (Lianzaw beh tawh), tanu tapa 8 Topa in pia hi. -1978 a ma kum (68) in Kuanglian khua ah si hi.
