Pu Song Thu
Kawlzang pan ei Zomite pupi khat ahi, Pu Song Thu makai in, mi (40) te tawh hong vaihawm khit uh ciangin, Tuingo luidung hong zuito uh hi. Thaangmual Thuamvum mun lakah hong kantan uh a, Vaimual ah hong tuak suk in Zaangpi tam hong tung suk uh hi. Zaangpi tam panin Ngatan luidung hong zuisuk uh a, Khuulpi (Suanghawm) mun Saizang gam sungah hong teeng uh hi. Pawlkhat te Thuamvum pan nitum na lamah tuaksuk in, Sialtaang luidung zui-in galkah kik uh a, “Khuulpi” mun hong tung tung uh hi. Khuul pan tai (4) bang gamlat na ah “Ciimnuai” khua hong sat uh hi.
Ciimnuai khua ah mi hong tam semsem ciangin, pawlkhat te in Meitei gun hong zui toto uh a, India gamsung Manipur leh Mizo gam dongah hong teeng to uh hi. Mizo gamah a teeng te Mizo (Lushai) ki ci-in, Manipur gamsung a teeng pawlkhat te “Paihte” kici a, pawlkhat “Zomi” mah kici hi. Ciimnuai a om lai te zong damdam in mi hong tam smsem ciangin, mun leh gam apawlpawl in hong zong uh a, Tedim leh Tonzang gamsung tengah hong ki thehthang leuleu uh hi.
Ki kawmna, ki phakna te haksat na hangin pau leh ham, beh leh phung te a mun leh ahun te hong sawt ciangin hong ki lamdang toto hi. Ciimnuai khuasat pen AD 1000 pawl ding in ki-um a, kum (300) sung bang Ciimnuai khua ah teeng dingin ki-um hi. Ciimnuai khua pan innmun, logam leh gankhawi cih te kithei pan-a, beh leh phung zong Ciimnuai khua pan hong piang pan ahi hi. Ciimnuai khua pan mi hong tam a, beh leh phung hong tam ciangin, phung khatah siampi khat, tulpi khat ciat hong kikoih uh a, tua dung zui in beh leh phung tuamtuam te kikeng to hi.
